قلم الكاتب الصحفي ياسر زينهم

1 البداية صقر في قفص العبيد
رابعة ما اتولدتش قديسة
اتولدت يتيمة فقيرة واتباعت جارية
يعني إيه؟
يعني الدنيا قالت لها من أول يوم
أنتي ملك حد مش ملك نفسك
بس الصقر حتى لو في قفص عينه على السما
جسدها كان مملوك بس قلبها؟
قلبها كان حُر من يوم ما اتخلق
القانون الأول
العبودية الحقيقية مش في الجسد العبودية في القلب اللي يرضى بالذل
ورابعة قلبها ما ركعش لغير اللي خلقه
2 العشق اللي كسر القيد
الناس بتتعبد خوف من النار أو طمع في الجنة
رابعة اخترعت مذهب تالت العبادة حب
كانت تقول إلهي ما عبدتك خوفاً من نارك ولا طمعاً في جنتك ولكن وجدتك أهلاً للعبادة فعبدتك
ترجمها بلغة الصقور
يارب أنا مش شغالة عندك باليومية أنا بحبك
والحب ما بيطلبش أجر
ده جنان؟
لا ده قمة العقل
لأن اللي بيحب عشان مقابل بياع
واللي بيحب عشان هو بيحب ده وصل
وده سر المنزلة العالية
هي ما طلبتش المنزلة المنزلة هي اللي جريت وراها
3 لما الدمعة تبقى صلاة
رابعة كانت تبكي في سجودها لحد ما تبل الأرض
سألوها بتبكي ليه؟
خايفة من النار؟
قالت لا والله ولكن شوقاً إليه
افهم بقى في ناس بتصلي عشان تخلص فرض
ورابعة كانت بتصلي عشان تلاقي حبيبها
الفرق؟
زي الفرق بين واحد رايح الشغل بالعافية وواحد رايح يقابل اللي بيحبه
الأول بيعد الدقايق والتاني بيتمنى الوقت يقف
عشان كده ربنا رفعها لأنها حولت
العبادة من واجب تقيل لـ موعد غرام
4 الكرامة في حضرة العشق
مرة الحسن البصري وده كان إمام كبير راح يزورها
لقاها بتخيط والدنيا ضلمة
فقال لها أجيبلك مصباح؟
قالت له الذي يُنير قلبي أولى أن يُنير بيتي
بص للجملة دي مش زهد دراويش
دي عزة صقر
بتقول له أنا مش محتاجة نور من عندك أنا عندي النور كله جوه
الدرس
اللي قلبه مليان بربنا ما بيستناش نور من العباد
وده اللي خلاها سيدة العاشقين
ما انكسرتش لحد
حتى في فقرها كانت ملكة
5 المنزلة العالية جت منين؟
الناس فاكرة إن الولاية كرامات تمشي على المية وتطير في الهوا
رابعة كرامتها كانت الصدق
1 صدقت في الحب فربنا صدّق معاها ورفع ذكرها 1200 سنة
2 صدقت في الفقر فبقت أغنى من الملوك لأن اللي معاه ربنا معاه كل شيء
3 صدقت في الحرية فسيدها حررها لما شاف النور اللي مالي أوضتها وهي بتصلي
القانون ربنا ما بيرفعش بالجسم ولا بالنسب
بيرفع بالقلب
وقلب رابعة؟
كان عرش مفيش فيه غير حبيب واحد
الخلاصة بمنقار الصقر في كبسولة
عايز تبقى في منزلة عالية زي رابعة؟
ما تدورش على المنزلة دور على الحب
1 اعبد ربنا كإنك شايفه مش كإنك خايف من العسكري
2 خلي دمعتك تنزل شوق مش رعب
3 نضف قلبك من أي حد عشان يبقى قصر فاضي لسيد القصر
رابعة ما كانتش شيخة بعمامة كانت جارية بإيد خشنة
بس لما حبت بصدق السما كلها سجدت لقلبها
فاسأل نفسك
أنت بتعبد مين؟
بتعبد اللي خلقك ولا بتعبد الجنة و النار اللي هو خلقهم؟
اللي يحل اللغز ده يبقى مشي أول خطوة في طريق رابعة