بقلم/نشأت البسيوني
في لحظة معينة بتحس إن حياتك اتبدلت من غير ما حد ينبهك وإنك بقيت ماشي في طريق شكله مألوف بس روحه غريبة طريق يشبهك في بعض التفاصيل لكنه مش طريقك اللي كنت متخيله ولا اللي حلمت تمشي فيه من البداية وتكتشف إنك اتغيرت من غير ما تقصد وإن التجارب اللي فاتت أخدت منك حاجات قد ما أدتك غيرها وإنك بقيت تشوف الدنيا بنظرة مختلفة فيها حذر أكتر
وصمت أطول ونضج ما كانش موجود زمان وكل ده حصل لأنك اضطريت تتعلم مش لأنك حبيت ومع مرور الوقت تدرك إنك بطل قصتك حتى لو الظروف حاولت تقنعك إنك دور ثانوي وإن اللي راح ما ينفعش ترجع له لا بقرار ولا بذكرى وإنك لازم تمشي بجسم خفيف وقلب فاهم إن اللي انتهى مش مكانك واللي باقي هو الطريق الحقيقي اللي لازم تحارب عشانه وتيجي لحظة غريبة كده
بين الهدوء والتعب تحس فيها إنك مش نفس الشخص اللي كنت عليه وإنك مش مستعد ترجع لنسختك القديمة حتى لو كانت أقل ألماً لأنك عرفت قيمة الخسارة وقيمة النجاة وقيمة إنك تكمل بإيدك مش بدفع الظروف وتبص قدامك وتقول لنفسك إن اللي جاي يمكن ما يكونش أجمل بس أكيد أصدق وإنك مهما تهزمت لسه واقف وإنك مهما اتكسرت لسه بتتصلح وإنك مهما الدنيا أخدت منك جزء
هتلاقي جزء تاني جواك بيحارب علشان يكمل وفي آخر السطر تفهم إن الظل اللي ماشي جنبك ما عادش نسخة منك لكنه نسخة أقوى اتولدت من كل وجع مر عليك وإنه حتى لو مختلف عنك هو الدليل الوحيد إنك نجوت وخرجت من كل حاجة كنت فاكرها النهاية علشان تبدأ بداية تانية تشبهك بحق
