بقلم/نشأت البسيوني

في وقت معين تلاقي كل حاجة بتبان بشكل مختلف كأن غشاوة كانت على عينيك واتشالت فجأة وتشوف تفاصيل كنت بتعديها وتشوف نوايا ما كنتش واخد بالك منها وتشوف نفسك كمان من زاوية ما كنتش عايز تبص منها وتبدأ تلاحظ إن في حاجات كنت بتصدقها بس علشان ترتاح وإن في ناس كنت مديهم أكبر من حجمهم وإن في مواقف كنت بتبررها علشان ما تخسرش حد أو ما

تواجهش حقيقة مش مريحة ومع الانكشاف ده تحس بصدمة خفيفة صدمة إنك كنت بتخدع نفسك قبل أي حد تاني وإنك كنت بتختار تبقى مش شايف علشان تكمل وإنك كنت بتأجل المواجهة علشان خايف من اللي ممكن يحصل بعدها وتبدأ تسأل نفسك ليه ما واجهتش بدري ليه فضلت مستني الحقيقة تيجي لوحدها ليه كنت بتدور على أعذار لكل حاجة غلط ليه كنت بتتمسك بحاجات

واضحة إنها مش ليك ومع كل سؤال تتكشف طبقة جديدة من الفهم تفهم إنك ما كنتش ضعيف لكن كنت بتحاول تحافظ على اللي حواليك حتى لو على حسابك تفهم إنك كنت محتاج وقت علشان توصل للمرحلة دي وتشوف الأمور بوضوح وتيجي اللحظة اللي تقرر فيها إنك مش هترجع تغمض عينيك تاني إنك هتقبل الحقيقة زي ما هي حتى لو كانت قاسية حتى لو هتخليك تبعد عن ناس أو

تغير طريق كنت ماشي فيه بقالك سنين وتبدأ تعيش بشكل أصدق تتعامل بوعي أكبر تختار بعقل أهدى ما تجريش ورا الوهم ولا تتعلق بحاجة مش حقيقية ولا ترضى بحاجات أقل من اللي تستحقه تفهم إن الانكشاف رغم وجعه كان نعمة لأنه خلاك تشوف بوضوح وخلاك تختار بصدق وخلاك تعيش حياة أقرب ليك بدل ما تفضل عايش في صورة

مش حقيقية