بتاريخ ١١/١٠/٢٠٢٦
قصيدة (هامش كتاب)
كلمات الشاعر المصري
أحمد إبراهيم النجار
رافض أكون
واحد على هامش كتاب
أو شئ مشابه للسراب
أو لعبة أخدت وقتها
والوقت فات
راحت بريقها وسحرها
وإتبدلت لذكريات
أصبح مصيرها للغياب
أنا مش هاعتبك
ع السنين
أو يوم هقرب
مستحيل
وجودي أصبح
شئ مُحال
راحل وهقفل ألف باب
رافض أكون
واحد على هامش كتاب
أو حرف واقع م السطور
ده أنا كنت نور
بس الغرور أصبح برود
كاسي العيدان
لو كنتي فاكرة إني هموت
أو هعاني م السقوط
فى بحر غدرك
قلبي مات
أصبح مجرد م الحنان
اصبحت على هامش كتاب
وكرهت باقي الذكريات
أنا كنت دور
فى مسرحية مؤقتة
أصبح ماليش
فيها الظهور
ورحلت عن باقي الفصول
ولا يوم هعود
على مسرحك
أنا ياما عشت أسعدك
فى كل دور
لكن خلاص مابقاش يفيد
مع قلبك القاسي العنيد
ده أنا كنت عيد
بس القريب منك بعيد
أصبح شهيد
والحلم فيكي والله مات
أصبحت على هامش كتاب
طال البرود
وركام وساكن فى السحاب
لما السقيع كاسي الغصون
لما الحنين دبلان ومات
والشعر شاب
رافض أكون
واحد على هامش كتاب
أو شئ مشابه للسراب
ده أنا كنت شمس
بنور شروق
بألف ألف ألف ضوء
مالي الدروب
مابين ذهابك والإياب
شدي الرحال
وقت الغروب وإبعدي
لا داعي للحظة هروب
أغلقت بابي
وانتهت كلمة عتاب
رافض أكون
واحد على هامش كتاب
أو شئ مشابه للسراب
لازم أقولك وإسمعي
أنا مش هموت
من بعد منك أو هضيع
مش طفل باكي أو رضيع
مشتاق لحضنك أو حزين
على كل شئ
رغم خداع كل السنين
اصبحت على هامش كتاب
نزل الستار
والمسرحية إنتهت
بفصول ضياع
بقول وداع
لكل حلم حلمته ليكي
من زمان
ولا ندمان
على كل خير
عملته فيكي أو حزين
إخترتي غيري تعشقيه
اصبحت على هامش كتاب
وفتحتي بابك
للعذاب جربيه
وعيشي حلمك وإسأليه
لو كان بيعشق جوهرك
أو كان بيحلم يسعدك
ولا كان بيعشق مظهرك؟
جربي والليل طويل إسهري
وعيشي يومك واحلمي
وهتندمي على كل شئ
قفلت بابي والطريق
اصبحت على هامش كتاب
وحرقت كل الذكريات
بعد ما شبت وشعري شاب
رافض أكون
واحد على هامش كتاب
ولا شئ مشابه للسراب
ومازلت على هامش كتاب
بقلم الشاعر المصري
أحمد إبراهيم النجار
