تسافر لأبعد مدى
تدخل في حشاك
مش ح تلاقى
باب مفتوح لك
ولا حتى يدوبك سندة حيط
تاخد نفسك مرة عليها
لساك فارد حزنك خيط
وتدارى دموعك
جوا ضلوعك
الديك يدن..
والفجر مشرف أحضانك
لكن لساك شايل
قفة أحزانك
خضرا الدنيا
ونعسانة علي دراعك
مهموم..
لكن مش هامك
مين عارضك؟
مين طاعك!
اصحي وصحصح
يمكن تتبدل أوجاعك
لا تخاف
لحظة اجحاف
يمكن مكتوبلك انصاف
من لحظة دق الهون
قبل ما يتنفس صبحك
عقرب ساعتك
يرفع رمشه
لاخر الكون
تلقى نهارك عدل أوضاعك
وتقابل حلمك
باجمل لون ***
فتحي ابو المجد
