بقلم/نشأت البسيوني
الطرق ليها سر غريب سر محدش يفهمه غير اللي مشي فيها وهو مش عارف نهايتها ولا حتى بدايتها ساعات الطريق يعلمك اكتر مما يعلمك اي كتاب وساعات ياخد منك حاجات كنت فاكرها ثابتة وما تتغيرش ويفاجئك بواقع عمرك ما حسبت حسابه الطرق مش بس أسفلت وحدود ومباني الطرق ارواح ماشية جنبه واحلام بتتولد فيه واحزان بتندفن تحته وناس عدت وناس وقفت وناس ما
كملتش الرحلة اصلا في كل طريق تمشيه هتلاقي أثر لشخص قبلك شخص كان بيعدي يمكن وهو شايل فرح يمكن شايل تعب يمكن شايل سر محدش عرفه ويمكن الطريق نفسه كان شاهد على انهياره وعلى وقفته من جديد وكل ده يخليك تحس انك مش لوحدك وانك ماشي فوق حكايات ناس حتى لو عمرك ما شفتهم ولا عرفت اسمهم والطرق ساعات بتبقى أصدق من البشر لان الطريق
عمره ما بيجامل ولا بيخدعك الطريق يقولك الحقيقة من اول خطوة لو انت ماشي صح هتحس وانك لو ضايع هتحس اكتر والاحساس ده ما يكذبش ابدا الطريق يديك تحذيرات يديك علامات يديك مواقف تخليك تعيد حساباتك وتعرف ان المسافة مش مجرد مشي المسافة تجربة كاملة بتدخل قلبك قبل ما تدخل رجليك وساعات الطريق يوقفك فجأة من غير مقدمات يوقفك
عشان يعلمك ان السرعة مش دايما وصول وانك في أوقات لازم تهدى لازم تستوعب لازم تفهم انت مشيت قد ايه وفضل لك قد ايه ولازم تفهم قبل ما تكمل انك مش نفس الشخص اللي بدأ الرحلة لانك اتغيرت اتلسعت اتعلمت وقلبك نفسه اتبدل من كتر اللي شافه
وفي لحظات معينة وانت ماشي لوحدك تحس ان الطريق بيكلمك احساس غريب لكنه حقيقي تحس كأنه بيقولك متخافش متترددش
متوقفش قدام باب اتقفل ولا قدام كلمة وجعتك لان اللي اتقفل مش ليك واللي راح مش نصيبك واللي وجعك كان درس يثبتلك إنك أقوى من اللي افتكرته وانك قادر تكمل حتى وانت مجروح وقادر تكمل حتى وانت مش فاهم النهاية رايحة لفين والطريق يعلمك حاجة محدش يقولها لك يعلمك انك مش لازم تفوز دايما ولا لازم تبقى الصح دايما المهم تكمل المهم ما تستسلمش المهم تمشي
مهما كانت الدنيا تقيلة ومهما كانت الظروف عكسك لان الوقوف هو الهزيمة الوحيدة الحقيقية واللي يعرف يكمل هو اللي يكسب حتى لو خسر حاجات كتير في النص ومع كل خطوة تلاقي نفسك بتكبر بتتغير بتقسى احيانا وتلين احيانا تضحك فجأة وتعيط فجأة وتفتكر وجوه راحت من زمان وتفتكر كلام ما عادش يفيد وتفتكر لحظات كنت فاكر انك نسيتها لكنها تعيش جواك وتطلع فجأة في
نص الطريق من غير دعوة وكأنها كانت مستنياك من سنين
وفي آخر كل طريق مهما كان طويل ومهما كان متعب هتلاقي إجابة إجابة يمكن ما توقعتهاش بس تكون هي بالظبط اللي محتاجها الإجابة اللي تقولك ان الرحلة نفسها كانت المقصود مش الوصول وان اللي اتعلمته وانت ماشي أهم من اي مكان كانت رجليك رايحة له لان القيمة مش في النهاية القيمة في الرحلة وفي اللي زرعته جواك وانت بتمشي
