كتبت :مريم اسامه
في قلب القاهرة.. حيث التاريخ يتنفس على أرض استادها الدولي، وعلى بساط مصري خالص، ارتفعت أعلام الأبطال في واحدة من أقوى بطولات الكاراتيه العالمية – “بريمير ليج كايرو 2025” – إحدى جولات الدوري العالمي للكبار، المؤهلة نحو منصة التتويج الكبرى في بطولة العالم.
على مدار ثلاثة أيام، عاشت الجماهير المصرية أجواءً من الحماسة والانتصار، وكانت قلوبهم تخفق مع كل ضربة يطلقها أبطال المنتخب الوطني. ومن قلب الحدث، أجرينا هذا الحوار الإنساني مع نجومنا ومدربيهم الذين أهدوا مصر الفخر والذهب.
الكابتن رغيد صالح
مدرب منتخب مصر تحت 21 سنة – أولاد
كيف تصف أجواء البطولة من قلب استاد القاهرة؟
بصراحة، البطولات التي تُقام على أرضنا لها طابع خاص. الحضور الجماهيري، والدعم، والتشجيع المستمر بيصنعوا فارق كبير مع اللاعبين، وده شفناه النهارده. الحمد لله، قدرنا نحصد المركز الأول في الترتيب العام للبطولة، بعد ما حصلنا على 4 ذهبيات، وفضيتين، و3 برونزيات.
من وقف خلف هذا الإنجاز؟
كنا كجهاز فني يد واحدة بقيادة الكابتن عبدالفتاح النجار، والكابتن هاني مدرب الإناث، والكابتن هبة مدربة منتخب البنات تحت 21، وأنا كنت مسؤول عن الأولاد. دعمنا اللاعبين بكل قوة، والحمد لله النتيجة كانت على قد تعبهم وتعبنا.
زياد الغريب
صاحب فضية الكوميتيه – وزن 60 كجم
ما الذي ميّز مشاركتك في بريمير ليج هذه السنة؟
دي أول ميدالية ليا في بطولة الدوري العالمي، فكانت لحظة مميزة جدا، خصوصًا إنها وسط جمهور بلدي اللي كان بيشجع بحفاوة لا توصف. الكاراتيه مش مجرد رياضة بدنية، هو كمان ذهني وفكري، وده شيء أنا اتعلمته بعمق في البطولة دي.
من إمتى بدأت تمارس الكاراتيه؟
بدأت وأنا عندي 4 سنين، والنهارده كان شعور لا يوصف، وخصوصًا لما شفت دموع الفرح في عيون أهلي بعد التتويج.
يوسف بدوي
لاعب منتخب مصر – وزن تحت 84 كجم
ما هو شعورك بالمشاركة في هذه الجولة؟
إحساس رائع، خصوصًا إن البطولة على أرض مصر. صحيح هي بطولة عالمية بتتكرر أربع مرات في السنة، لكن وجودها هنا بيخليها مناسبة وطنية بامتياز. أنا شاركت بإيدي المكسورة – اتكسرت قبل البطولة بـ5 أيام – لكن قررت أشارك رغم اعتراض الأطباء، والحمد لله عدت على خير.
هل هي أول مشاركة لك في البريمير ليج؟
لا، عندي 12 ميدالية في البريمير ليج. بلعب كاراتيه من 20 سنة، من وأنا عندي 4 سنين.
عبدالله هشام مصطفى
لاعب منتخب مصر للكاراتيه
كيف كان تأثير إقامة البطولة في مصر عليك كلاعب؟
لما تلعب على أرضك، وسط أهلك وصحابك، بتحس إنك مش لوحدك. الدعم الجماهيري بيديك طاقة غير عادية. ووجود كل شباب مصر اللي بيحبوا اللعبة وبيجوا يتفرجوا علينا، ده شرف كبير. الحمد لله قدرنا نفرحهم، وكفريق حققنا المركز الأول في الترتيب العام، وده بيدعو للفخر.
هل واجهت صعوبات؟
أكيد، دي بطولة قوية جدًا، فيها أعلى 32 لاعب مصنف في العالم. فكل ماتش بيبقى نهائي لوحده.
عمر أشرف عثمان عبدالعال
لاعب منتخب مصر للكاراتيه
ما هو شعورك بعد مشاركتك اليوم؟
كان شعور كبير جدًا، والحمد لله الناس كلها جات وشجعت، وفرحوا بينا، وده أهم شيء.
من هو قدوتك في الكاراتيه؟
مصر فيها أبطال كتير، بس لو هقول أسماء، فأكيد عبدالله ممدوح ويوسف عماد – اللي كسب المركز الأول – من الناس اللي ألعب معاهم شرف كبير.
متى بدأت مشوارك مع الكاراتيه؟
من وأنا عندي خمس سنين، وإن شاء الله لسه المشوار طويل قدامي.
رسالة تحب توصلها للجمهور المصري؟
شكرا من القلب لكل الناس اللي جات وشجعتنا، دعمكم فوق راسي، وإن شاء الله نكون دايمًا عند حسن ظنكم.
بطولة “بريمير ليج كايرو” كانت أكثر من مجرد منافسة دولية، كانت مهرجانًا وطنيًا للكاراتيه، وموعدًا للعزف على أوتار الفخر المصري. أبطالنا على البساط، وجماهيرنا في المدرجات، والمدربون في الصفوف الخلفية… كلهم جسدوا روحًا واحدة: روح مصر المقاتلة.
