بقلم/ مجاهد عبد الهادي
اسألوا الهويس اسألوا القنال
السويس دي بلد الرجال
من غير علم هي علم
طول عمرها فن وقلم
وعمرها ما حد اتخلى عنها
إلا الكل ساعة الجد
نادى وقال روحي لها فدي
بلد الصمود بلد الأحرار
طول عمرها أم للأبطال
زي ما قال اللي شاف
بعينه وحكى عن البطل
اللي كان خارج
من وسط الشظى
وعينه طالعه لبرا
من تحت حاجبه
ويقول انا شايف
روح شوف زميلي اللي جوه
وزميله يقول انا كويس
وقلبه بينبض باين من ورا ضهره
عزيمه وقوه
عسكري او فرد عادي
كلهم رجال
حتي العسكري اللي كان بيبكي
مكنش بيبكي من جرحه
كان بيبكي
علشان ماشفشي
اللي ضربه مش من جرحه
كان نفسه يشوفه من وشه
علشان يقرقش عضمه
عمرك ما هونتي على ولادك
ولا قفلتي على الغريب بابك
حتى اللي كان مريض
وفي المستشفى
أول ما سمع صوت العدو
مسك سلاحه وطلع يجري
لبرا بعزيمه وقوه
ده العسكري الوحيد
اللي مرضيش يفرط في سلاحه
حتى وهو جريح
علشان يجيب حقك يا بلدي
الحرب كانت قويه
وصاحب الحق عينه قويه
ساعتها كان المدد من الله
وفضله علينا قال اللي شاف
ان العسكري كان بيضرب
بكل طلقة دبابه وكأنه
عايش طول عمره على الارض بيحارب
اسالوا الهويس اسالوا الجزيره الخضرا
اسالوا القنال
عن السويس اللي ياما ربت رجال
