ثابتين على المبدأ.. والباقي فعل ماضي
الشاعره / ام هاشم العيسوي
إحنا مش بنندم كتير
ولا بتغرّنا المظاهر
إحنا صاحي فينا الضمير
وطظ في أي حد
يحب يكون بس ظاهر
تفرّحنا كلمة طيبة وكلمة تقدير
ولو مجتش… يبقى بناقص
اللي في قلبه مخافة ربّه
طول الوقت هيكون كبير
مش مهم مين كارهه ومين حبّه
المهم ثابت على مبدأه من غير تغيير
مالنا إحنا باللي يتقال
ولا نشغل بالنا بهري فاضي
دول آخرهم يحسدونا… خليك طويل البال
وما زالوا… وفي المستقبل فعل ماضي
ولو وجّهت ليهم ألف سؤال
مش هتلاقي ولا إجابة
اللي تفكيره شمال هيفضل شمال
واللي مركز زيادة في حياتنا
طول الوقت بيخلق عيوب ويِعيب
ونفوس مريضة… مش حيوانات غابة
يبصّوا للي في إيدينا ومستكترينه
ونفوسهم مريضة ومش عاجبها حالها
المريض بنقصه… ربنا يعينه
دي الأيام سريعة والدنيا قَلّابة
واللي بيعمل شر… المواقف كفيلة تدينه
قول: يا رب… وراسك لفوق
وارفع سبابتك بثبات
حقك راجع مهما تكتر سنينه
والظلم عمره ما بيبات
فاطمّن… واتحلّى بالهدوء والصبر
وسيّبها على اللي ما بيغفلش ولا بينسى
عليه العِوض… وعليه الستر والجبر
وربنا يعوّض القلب عن كل وجعٍ قسّى
✍️ أم هاشم العيسوي
