عادل محمود
منة شافت أبوها لأول مرة وهي عندها ٢١ سنة، يعني مش وهي صغيرة و بتجري عليه، ولا في أول يوم مدرسة، ولا حتى وهي بتتخرج!
وده كله لأنه كان بيتجوز كذا مرة وعايش برا مصر، عشان كدا كان بعيد عنها وميعرفش عنها أي حاجة ولا شاركها مراحل حياتها.
و حكت إن لما كانت بتتخطب لأول مرة، وخطيبها وأهله راحوا يخطبوها من والدها، وكانت صدفة إنه في مصر قالهم خدوها، أنا مش عايز منكم حاجة!”
هي نفسها اتصدمت، و حسّت إنها اترمت، وقالت: “مفيش أب يرمي بنته كده، أنا لو أب كنت طلعت عين العريس!”
والأغرب كمان لما أكدت إن ليها إخوات من أبوها، تعرف منهم اتنين، والباقي لا عمرها شافتهم ولا تعرف ملامحهم.
بس رغم كل ده أمها كانت دايما واقفة في ضهرها وعوضتها من صغرها عن وجود الأب.
وخليتها دايما مشغولة بالسفر والمذاكرة والفسح، وحاولت تخليها مش مركزة أوي مع فقدان أبوها، لكن ده ميمنعش ان منة بتأكد دايما إن نشأتها وهي صغيرة مختلفة عن نشأة أي حد طبيعي متربي بين أم وأب.
وعلى الرغم من المشكلة اللي حصلت بينها وبين مامتها زمان لما منة قررت تتجوز من وراها، لكن علاقتهم بعد كدا رجعت أحسن من الأول.
وبقت تقول عنها على طول: “أمي أغلى حد في حياتي.”
