بقلم: مروة شعلان
عقوق الابناء من اقسى الالم اللي ممكن يمر به اي اب او ام
وجع صامت ملوش صوت لكنه بيكسر القلب كل يوم
ام تعبت وسهرت وضحت وصبرت
واب شال هم الحياة وحاول يوفر الامان
وفي الاخر يلاقوا جحود بدل الرحمة وقسوة بدل البر
العقوق مش بس ضرب او اهانة
العقوق كلمة جارحة
نبرة صوت عالية
تجاهل متعمد
اهمال مشاعر
وبرود في التعامل
كل ده عقوق حتى لو مفيش ايد اتمدت
كتير من الابناء فاكرين ان العقوق بيبدأ لما يشتموا
لكن الحقيقة ان العقوق بيبدأ لما ينسوا فضل
لما يشوفوا تعب اهلهم حاجة عادية
لما يحسوا ان الام واجب مش نعمة
وان الاب موجود علشان يدي وبس
الزمن اتغير
والضغوط زادت
لكن ده مش مبرر للقسوة
ولا مبرر ان الابن ينسى ان اللي قدامه انسان
كبير في السن
تعبان
محتاج كلمة طيبة قبل ما يحتاج فلوس
القرآن والسنة شددوا على بر الوالدين
وجعلوه من اعظم الاعمال
وربطوا رضا الله برضاهم
مش علشان هما ملائكة
لكن علشان تعبهم سابق اي تقصير
وتضحيتهم اكبر من اي خطأ
العقوق بيرجع
يمكن مش في نفس اللحظة
لكن بيرجع في صورة قسوة من الابناء
او وحدة
او ندم متأخر
لان اللي يتعود يقسي قلبه على اهله
قلبه يقسى على نفسه قبل اي حد
احنا محتاجين نراجع نفسنا
نراجع اسلوبنا
نفتكر تعب امهاتنا
وشقى ابائنا
ونفهم ان كلمة حاضر
ولمسة ايد
ودعوة صادقة
ممكن تكون سبب نجاة في الدنيا والاخرة
بر الوالدين مش ضعف
ولا تقليل من الكرامة
ده رفعة
وسلام داخلي
وبركة في العمر والرزق
اللي لسه عنده ام او اب
لسه عنده فرصة
واللي ضيع الفرصة
مش هيعرف قيمتها غير لما يندم
والندم ساعتها مش هيغير حاجة
