بقلم/نشأت البسيوني

داخل قلب لا يعرف الطريق القصير تلاقي الحيره ساكنه في ملامح الايام وتلاقي الرحله ماشيه من غير اي اختصار لان فيه قلوب اتخلقت من طين تاني قلوب ما تعرفش يعني ايه تجري في الطرق السهله ولا تمشي في الاتجاه اللي ناس كتير بتجري فيه قلوب شايله جواها صدق يخوف ووجع ساكت واصرار ما بيتهزش ابدا
النوع ده من القلوب عمره ما يعرف يعدي مرور الكرام لانه لما يحس

يحس بكل وجوده ولما يفرح يفرح للاخر ولما يتوجع يتوجع لدرجه تهز الصمت اللي جواه قلب ما يعرفش يعيش النص ولا يحب بنص احساس ولا يقول كلمه وهو مش قاصد معناها قلب يا كل شيء يا ولا شيء وعشان كده تلاقيه دايما واقف بين صراحه نفسه وبين عالم كله سرعه وكله مجاملات وكله مشاعر مقطوعه القلب ده بيتعرض كل يوم لامتحان جديد امتحان انه ما يندفعش مع انه

احساسه بيزعق جواه وامتحان انه ما ينكسرش رغم ان الدنيا ساعات بتكون سيف وامتحان انه يحافظ على نقاءه وسط عالم كله شوشره وكله اختصارات ناس بتشوفه غامض وتقل وتبعد عنه ومش فاهمه انه واضح زي الميه وان شفافيته هي اللي بتوجعه
القلب اللي ما يعرفش الطريق القصير ده قلب شايل حمل ما حدش شايفه شايل ذاكره ما بتنساش شايل ضمير يصحى قبله وينام بعده

قلب لما يحب يحب بكل تفاصيل الروح ولما يزعل يزعل بكل صدقه ولما ياخد قرار البعد يمشي فيه للاخر لانه ما يعرفش الرمادي ولا يعرف يسيب باب مفتوح وراه وفي كل اللي بيعدي عليه يفضل واقف ما يتهزش ما ينكسرش حتى وهو موجوع حتى وهو بيتساءل جواه لحد امتى يفضل بيحارب عالم مش شبهه القلب اللي ما يعرفش الطرق القصيره هو القلب اللي هيفضل دايما

صادق حتى لو ده وجعه وهيفضل ماشي وحده حتى لو الطريق طويل وهيفضل نوره ثابت حتى لو الدنيا كلها مطفيه حواليه
يفضل يدور على حد يفهمه مش حد يمشي معاه حد يفهم حكايته وعمقه واصراره وهدوءه حد يعرف ان جوه القلب ده عالم كامل بيتنفس بصدق وبيحارب بصمت وبيحب بقوه لا يعرفها غير اللي ربنا فتح بصيرته على النقاء