بقلم/نشأت البسيوني

في وقت معين من الرحله الواحد بيكتشف إن الصمت مش دايما هروب ولا ضعف أوقات الصمت بيبقى هو الشاهد الوحيد على اللي قدرنا نعديه من غير ما نحكي وعلى اللي جروحنا اتعلمت تخبيه وعلى اللي قلبنا جرب يصرخ وماحدش سمعه فقرر يسكت بس مايرجعش لورا ويسكت بس يكمل ويسكت بس يفتح لنفسه طريق من غير ما يستنى حد يقوله امش ومع الأيام بنفهم إن فيه حاجات

كنا فاكرينها بدايات طلعت دروس وإن فيه ناس كنا شايفينها أعمدة البيت طلعت مجرد ظل أول ما الشمس غابت اختفوا وإن فيه لحظات كانت بتوجع لدرجة إنها كسرت جوانا حاجات ما رجعتش تاني بس رغم ده علمتنا إن اللي يقسو علينا بيدينا هدية غريبة هدية اسمها قوة وهدية اسمها فهم أكتر وهدية اسمها قيمه نفسنا اللي ضيعناها سنين بنرضي في غيرنا والإنسان لما يقف مع نفسه

بالليل وينضف روحه من الوجع ويعدل ميزان قلبه هيعرف إن اللي مشي ماكانش ليه مكان واللي بقى هو اللي فعلاً يستحق البقاء وإن ربنا بيشيل من طريقك ناس ويفتح لك أبواب أنت ماكنتش تتخيل إنك هتدخلها يوم وفي لحظة صدق بينك وبين نفسك هتعرف إن التعب اللي شلته على كتفك سنين مش ضعف ده تاريخك وإن الدموع اللي نزلت من غير ما تشوفها عين ده طهارة قلبك وإن اللي

اتكسر جواك مش نهايتك ده بداية جديدة لحد تاني أقوى وأعمق وأهدى هتعرف إن الصمت ساعات بيبقى حضن وإن الوحدة ساعات بتربي فيك بصيرة وإنك ما احتجتش لحد قد ما احتجت لنفسك وإن الطريق مهما لف ودار هييجي يوم يسلمك لمكان أنت تستحقه ومكتوب لك من زمان بس كان مستني تبقى جاهز له بكل اللي عديت بيه وبكل اللي اتحملته من أوجاع ومن خيبات ومن نهايات ماكنتش يوم متوقعها لكنها كانت بدايتك الحقيقية من غير ما تحس