تحت جلد الأيام

بقلم/نشأت البسيوني 

في مساحات كده محدش بيدخلها غيرك مساحات مخفيه تحت جلد الأيام الأماكن اللي بتحط فيها كل الحاجات اللي ما ينفعش تقولها اللي ما لقيتش ليها حضن يتسع ولا ودن تستقبل ولا قلب يتحمل وبتسيبها هناك مرصوصه جنب بعض وجع على خيبة على خوف على كلام ما اتقالش ومواقف ما خلصتش وردود كنت تتمنى تقولها وسكت ومع مرور السنين بتكتشف إنك عايش بنسختين 

نسخه بتتعامل مع الدنيا بوش ثابت وكلام موزون وخطوات محسوبه ونسخه تانيه مدفونه جواك بتصرخ من غير صوت بتنهار من غير ما حد يشوفها وبتقوم لوحدها من غير ما حد يسندها النسخه اللي بتشيل كل اللي اتقال لك بالغلط وكل اللي اتاخد منك بالغصب وكل اللي استحملته وانت ساكت علشان ما تكسرش حاجه كنت خايف تضيعها وبتفضل ماشي في الحياة وكأنك بتفك عقده 

بعقده عقده من خيبه قديمه عقده من كلمه وجعتك عقده من روحك لما اتعلقت بالغلط عقده من حلم اتسرق منك في وقت ما كنتش جاهز عقده من ناس ما عرفتش قيمتك غير لما خسروك وبقوا يدوروا عليك في طرق ما عدتش بتمشي فيها وفي الوقت اللي بيفتكروا إنك بقيت أقوى فالحقيقه إنك بقيت أعمق صرت تقرأ الوشوش من أول سلام وتفهم النوايا قبل ما تقال وتعرف إن مش 

كل ضحكه صدق ومش كل وعد نوايا صافيه ومش كل قرب أمان وإن أقرب الدروس لقلبك كانت أغلاها وجعا وعلشان كده بقيت تهتم بنفسك بطريقه مختلفه بقيت تحافظ على قلبك أكتر تبعد عن الضوضاء وتخف من الناس اللي بياخدوا منك وما يدوكش وتبقى صريح مع روحك لأول مره وما تخافش تقول إنك اتأذيت وإنك كسرت وإنك وقعت وإنك قمت لوحدك وإنك محتاج ترتاح لأن 

التعب مش خجل والضعف مش عار والصراحه مع النفس مش هزيمه لأن تحت جلد الأيام اتكونت فيك نسخه ما حدش يعرفها نسخه أكبر من كل اللي حصل وأعمق من كل اللي راح وأصدق من كل اللي بان للناس نسخه اتربت على الخساره وقامت على الدروس واتشكلت من الرماد لحد ما بقت نار وبقيت إنت اللي ما يتكررشي إنت اللي مش بيطيحك يوم صعب ولا موقف قاسي ويمكن أجمل 

حاجه إنك بقيت عارف قيمتك من غير ما حد يقولك بقيت شايف نورك من غير ما حد ينورهولك بقيت مدرك إن طريقك بتبنيه برجلك مش بكلام حد وإن الأيام مهما تقست تفضل بتشكلك مش بتكسرك وبتقويك مش بتنهيك وكل ما تعلق جرح جديد تكتشف إنك أوسع وأعمق من قبل إنت مش ابن الظروف إنت ابن وقفتك بعد ما اتكسرت ابن قرارك بعد ما اتوهت ابن كل مره قلت لنفسك 

هكمل وانت مش شايف غير الضلمه وتأكد إن تحت جلد الأيام قاعد بيكبر جواك شخص مستحيل يرجع زي زمان لأنه بكل بساطه اتغير للأفضل جوه المعارك مش بعيد عنها