يا لحظة البوح اللي بتنادي على باب الحنين،
وتخربش الروح بين وريدي والوتين.
متشعبطة حروفي في مدار
ما لوش حدود، ولا قرار،
ما بين نعيم جنة ونار،
وغيام يضلل عَلى المدى،
وزهور بتشرب من الندى.
البوح في لحظة من صيام،
عطشان لنور يملى القلوب،
ويدور مع كل الدروب،
يوصل لأبواب السما،
والروح سفيرة ملهمة
تكتب على الشكل الغريب
حلمٍ اتنسى،
وتسقي في نبضي الرجاء
من غير أسى
أنا البعيد اللي احتمى
في حضن ذكرى من زمن،
شهقة في سكة الحنين،
مدّ إيديه للي اختفى،
وساب ضياه على الجبين،
مستني لحظة من جمال
أو حتى همسة ترتعش
في سكون سؤال.
أنا الضمير اللي وقف
في وش جبروت الحياة،
أنا الشعاع اللي مرق
بين الليالي والنجوم،
سهم الحقيقة اللي انطلق
من قوس محاوطاه الهموم
وصاب قلوب اللي غدر
والدم نازل يعتذر
للطيبين من البشر.
أنا بدر بينوّر ليالي
في نص شهر،
وهلاله يرجع يختفي
من مرّ غدر
وسحاب بيجري في الغياب
تايه مع سحر الضباب.
أنا كلمة فوق سطر المشاعر،
ما بين أمل وبين عذاب.
أنا بوح في سجن وشرنقة،
مستني نور المعجزات
يظهر مع لحظة لقا،
بتحديات من عمر فات
أنا صوت مطر
نازل على ورق الشجر،
يغسل هموم غدر السنين،
ويزين اللوحة بصور.
أنا شقشقة فجر الأمل،
والمستحيل والمحتمل،
والكلمة فوق سطر الحياة،
من غير شعور لا تكتمل.
أنا روح تروح ويا الصفا
والحلم مبتور واختفى،
مستني يوم أعرف جواب
يطوي حنيني بالدفا.
أنا الدموع، وأنا البكا
بين السلام والمعركة،
بوشوش الليل والسكون
واتوه مع سحر العيون.
أنا السؤال اللي اتولد
في لحظة تاه منها اليقين،
والجواب اللي اتوجد
للعاشقين والمغرمين.
أنا اللي كان معنى الحياة
في عينيه قصيدة اتسرسبت،
منها السطور، واللحن ضاع.
أنا الغياب اللي حضر
جوه قلوب متشوقة،
وأمل كبير زاحف وراه.
أنا اللي واقف في الزحام،
ما بين ملامح مبهمة،
وبين حكايات الكلام،
وبين وجوه شايلة الملام.
أنا الصدى لحظة دفا
أنا الحنين اللي احتمى
وسط النجوم،
فوق في السما
ولا كلمتي دخلت سبق
ولا فزت يوم بالأوسمة
عامل حدود جوا القيود
راسم خطوط متحرمة
ماسك لجامي بإيد حديد
أصل المشاعر لو تزيد
نارها أكيد حتما تإيد
وكل يوم البوح ينادي
في حياتي من جديد
ويهد سور حواليه جسور
والكلمة نور طول الزمن
بتداوي أوجاع المحن
وبتبني جيل
وتشق ضلمة ليل طويل
معنى جميل وسلسبيل
وشعور جريء
والبوح في لحظة بيتولد
إحساس بريء
وطوق نجاة وسط الحياة
بيمد ايده للغريق
طول الطريق
البوح صديق
الشاعر أسامة محمد عضو اتحاد كتاب مصر وعضو نادي الأدب
