بقلم/نشأت البسيوني

في لحظات معينه في حياتك بتحس إن الدنيا وقفت فجأه مش علشان حصل حدث كبير ولا مصيبه واضحه لكن علشان الكلمه اللي وقعت عليك ما كنتش مستعدلها الجمله اللي خرجت من حد عمرك ما حسبتله حساب إلا الطيبه والسند والحب الجمله اللي قلبك ما تخيلش يوم إنها تطلع منه لكن خرجت وخبطت فيك خبطه ما لهاش وصف وسبتك مرعوش واقف مكانك مش عارف هل دي

حقيقه ولا كابوس جاي يصحيك من أمان انت كنت مصدقه في ناس ما بتوجعكش بضربه الناس دي بتوجعك بالخذلان الخذلان اللي يجي في لحظه انت فيها فاتح صدرك ونازل حميتك وحاطط قلبك في إيدهم من غير ما تفكر إنهم ممكن يضيعوه الناس اللي كنت بتقول عليهم سندك اللي قلت عليهم الراحه اللي اعتبرتهم الضهر في الزمن اللي كله خوف فجأه تلاقي الكلمه جاية منهم هما

مش من غريب مش من عابر من حد من المفروض إنه يعرف يعني إيه وجعك ويعرف يعني إيه تعمل حساب لمشاعرك وتبقى واقف بتسأل نفسك مليون سؤال ليه عمل كده ليه وجعني ليه ما فكرش حتى دقيقه قبل ما ينطق الجمله دي ليه ما شافش لحظة الانكسار اللي حصلت في عنيا ليه ما حسش إن قلبي اتكسر وهو بيتكلم ليه ما افتكرش كل مره كنت جنبه كل مره اتسند عليا كل مره شلت

اللي وقع منه وكنت دايما موجود من غير طلب وتتفاجئ إنك كنت بتحب وتحافظ وتوفي لحد ما يستحقش النص اللي كنت بتديه وإنك كنت شايف الحياه من زاويه واحده زاوية اللطف اللي انت اتربيت عليه مش زاوية الحقيقه اللي بتقول إن البشر ممكن يتغيروا في لحظه البشر ممكن يبقوا أنت كل حاجه في يوم وكل ولا حاجه في يوم تاني البشر اللي كانوا بيقولوا كلام يمسح الوجع هما نفسهم

اللي يعرفوا يزرعوه جوه قلبك من غير ما يرجعوا يبصوا وراهم

وتقعد ليالي طويله تفكر هل انت الغلطان إنك كنت طيب قوي ولا هو الغلطان لأنه ما قدرش هل انت المفروض تغير نفسك ولا المفروض تغير اختياراتك هل الوجع ده نهايه ولا بدايه هل انت اتكسرت ولا اتعلمت والرد بييجي مع الوقت مش بسرعه لأن الوجع الحقيقي ما بينتهيش بسرعه ولا بينزاح بكلمتين هو بيدوب شويه

بشويه وبيسيب أثر كبير يخليك أصحى على فهم جديد وتفهم إنك مش غلط إنك تحب ولا غلط إنك تدي ولا غلط إنك تتعلق الغلط الحقيقي إنك تدي قلبك لحد يشوف قيمته متأخر الغلط إنك تسلم مفاتيح روحك لإنسان مش قدها ومع كل يوم يعدي هتلاقي نفسك أقوى وهتلاقي قلبك رغم الوجع لسه قادر يعيش وهتلاقي روحك رغم الكسرة لسه بتدور على نور وهتلاقي دمعتك اللي نزلت كانت

مش ضعف كانت تطهير ومع الوقت هتفهم إن اللي خذلك ما كانش سند واللي وجعك ما كانش حب واللي مشي ما كانش نصيبك وإن ربنا بيشيل من طريقك ناس علشان يفتحلك طريق أنضف وأهدى وأوسع