كتبت د.صباح عبد الراضي رفاعي

بعد ظهور إصابات ووفيات مرتبطة بسفينة سياحية متجهة لإسبانيا. بسبب فيروس هانتا

سألنا الدكتور أحمد إبراهيم أستاذ جامعه الملكه في انكلترا عن المرض وما خطورته ..

قال الدكتور أحمد ابراهيم بس خلينا نفهم الموضوع بهدوء.

فيروس هانتا مش فيروس جديد، ومش زي كورونا، ومش بينتشر بسهولة بين الناس في أغلب أنواعه .

المصدر الأساسي للعدوى غالبًا بيكون الفئران والقوارض، عن طريق البول أو البراز أو اللعاب، خصوصًا لما المكان يكون مقفول ومليان فضلات قوارض، وبعدها يتنفض التراب أو يتكنس، فتدخل الجزيئات الملوثة للجهاز التنفسي

يعني الخطر الأكبر مش إنك تقعد جنب واحد في المواصلات.

الخطر الأكبر إنك تنظف مخزن، أو بدروم، أو شقة مقفولة، أو مزرعة، أو كراج، أو مكان فيه فئران، بطريقة غلط.

سألنا الدكتور أحمد إبراهيم ..
ما هي أعراض فيروس هانتا ،، اجاب

الأعراض ممكن تبدأ كأنها دور برد أو إنفلونزا:
1- سخونية.
2- تعب شديد.
1- آلام في العضلات.
4- صداع.
5- قيء أو إسهال أحيانًا.

سألنا ما الخطر فيه ،،أجاب دكتور أحمد إبراهيم براهيم
الخطر إن بعض الحالات ممكن تتطور لمشكلة شديدة في التنفس، وخصوصًا لو الشخص اتعرض لكمية كبيرة من الفيروس.

طيب نعمل إيه؟ قال ،،
أولًا، متكنسش فضلات الفئران وهي ناشفة.
دي أهم نقطة.

لأن الكنس ممكن يطير الجزيئات الملوثة في الهوا.

البس جوانتي.

رش المكان بمطهر أو كلور مخفف.

سيبه شوية.

وبعدين امسح بمناديل أو فوطة قابلة للتخلص منها.

اقفل أي فتحات يدخل منها الفئران.

متسيبش أكل مكشوف.

نظف المخازن والكراجات والأماكن المقفولة بتهوية كويسة.

ولو دخلت مكان قديم أو مقفول من فترة، افتح الشبابيك الأول وسيبه يتهوى قبل التنضيف.

ولو عندك سخونية وتعب شديد وضيق نفس بعد تعرض واضح لمكان فيه فئران أو فضلات قوارض، متستناش، راجع طبيب فورًا وقل له على التعرض ده.

واخيرا قال الدكتور أحمد إبراهيم
الخلاصة:

مفيش داعي للذعر. فيروس هانتا مش قصة رعب، لكنه تذكير مهم إن النظافة مش بس شكل البيت، النظافة كمان طريقة آمنة للتعامل مع المخاطر اللي مش شايفينها.

احمِ بيتك من القوارض.

نضف صح.

وإوعى تحوّل الكنس العادي لمشكلة صحية خطيرة