✍️ أم هاشم العيسوي
روح وخد معاك كوم ذكريات
روح وخد حبة الكراكيب
إنت نسيت كل اللي فات
وأنا قلبي مبقاش حمل تعذيب
أبو قلبي لو فكر يرجعلك
وأبو الحب اللي خلّى قلبي مداس
ألف مليون مرة كنت أسمعلك
وإنت سوقت العوج ونسيت العيب
كنت فاكرني جبل مبيتهزش
يشيل منك ولا عمره يشتكي
مواقفك معايا والله حتى صعب تتحكي
ويلا كله يرجع لاختياري وده النصيب
فاكر لما كنت أقولك عنيا فداك ومتتعزش
وإنت ولا مرة جبرت خاطري بكلمة
دبحت مشاعري بمليون سكينة تلمه
ولا صعبت عليك الطرق والأساليب
الوحدة أكرملي مليون مرة
من حد عاش حياته لنفسه وبس
كنت أديك ألف عذر عشان تحس
وإنت كل مرة تطلع فيا أنا العيب
يا خسارة وقت ضاع في إرضاك
ويا خسارة قلب كان ليك حبيب
كنت فاكرة يوم هتخاف على هواك
طلعت أنا اللي كنت عايشة في سراب كدّاب غريب
