بقلم/نشأت البسيوني

في لحظة معينة تحس إنك ماعدتش قادر تمشي بنفس السهولة اللي كنت ماشي بيها زمان تحس إن كل خطوة بقت حمل وإن الطريق بقى أطول من اللازم وإنك بتتقدم بالبطء اللي يخليك تشك هل انت ماشي ولا واقف مكانك من سنين يجيلك شعور غريب إنك تعبت من التفكير وتعبت من الانتظار وتعبت من المحاولة وتعبت من الصبر وتعبت من انك تفضل قوي طول الوقت لدرجة إنك بقيت

بتتمنى لو حد يشيل عنك نص اللي جواك أو حتى يسمعك من غير ما يحكم وتنسي إن التعب مش ضعف وإن البطء مش فشل وإن التوقف مش نهاية لأن روحك مش آلة قلبك مش جهاز مش مطلوب منك تكمل بأقصى سرعة ومش لازم تثبت قوتك لأحد وفي اللحظات اللي تحس فيها إن خطواتك تقيلة بتظهر حقيقة تانية يمكن ماخدتش بالك منها الحقيقة إنك لسه ماوقعتش لسه بتحاول

رغم كل اللي وجعك لسه بتقوم بعد كل مرة تتعثر فيها ولسه بتدور على حاجة تتمسك بيها حتى لو كانت صغيرة وفي عز التعب تبدأ تشوف الأمور أوضح تعرف مين كان بيسندك بصدق ومين كان عبء تعرف ايه اللي يستحق وجودك وإيه اللي استنزفك تعرف إنك محتاج راحة مش لأنك ضعفت لكن لأنك إنسان وتكتشف إن الطريق اللي انت ماشي فيه مش محتاج سرعة قد ما محتاج ثبات

وإنك حتى في أبطأ حالتك بتتعلم وبتتغير وبتنضج وإن الخطوات الثقيلة بتبنيك أكتر من الخطوات السريعة لأنها بتخليك تحس بكل حاجة وتفهم كل شيء وفي اللحظة اللي تفتكر فيها إنك ماعدتش قادر تكمل تلاقي جوهك قوة مش عارف مصدرها يمكن من ذكرياتك يمكن من أحلامك يمكن من دعوة قلتها في ليلة هادية يمكن من ربنا اللي بيقرب منك لما تبعد عن نفسك هتعرف إن أثقل

الخطوات هي اللي بتاخدك لأعمق نقطة فيك وإن الطريق اللي كان صعب عليك النهاردة هيكون أبسط بكرة وإن التعب اللي جواك مش آخر الحكاية ده بداية لفصل أوضح وأنضج وأقوى