بقلم الإعلاميه / مروة شعلان
انا شوفت فيديو مستفز جدا لبنت واقفة في الشارع وسط مجموعة شباب وبتضحك وتهزر معاهم بطريقة فيها قلة حياء واستخفاف غريب جدا مشهد يوجع القلب قبل ما يستفز الاعصاب
السؤال اللي لازم يتقال بصوت عالي فين اهل البنت دي
فين الاب فين الام فين الاخ
فين التربية وفين الخوف على السمعة وفين الاصول اللي اتربينا عليها
احنا عمرنا ما كنا مجتمع بالشكل ده عمر ما البنت المصرية كانت بتقبل تبقى بالصورة دي قدام الناس البنت زمان كانت عنوان للحياء والاحترام وكانت بتخاف على نفسها قبل ما اهلها يخافوا عليها
اللي بيحصل دلوقتي بقى يخوف بجد بقينا نشوف تصرفات غريبة وكأن الحياء بقى حاجة قديمة وكأن الحدود اللي كانت بتحمي البنات بقت بتتكسر واحدة واحدة
انا مش بتكلم عن بنت واحدة بس
انا بتكلم عن ظاهرة بدأت تنتشر وعن فكرة ان في ناس بقت شايفة ان الجرأة الزيادة دي حرية
لا دي مش حرية
دي ضياع اخلاق وضياع تربية وضياع احساس بالمسؤولية
الحرية عمرها ما كانت قلة ادب
والضحك والهزار له حدود
والشارع مش مكان يتعمل فيه استعراض بالشكل ده
والاصعب من كل ده اننا نسأل نفسنا سؤال مهم ازاي وصلنا للمرحلة دي وازاي في اسر سايبة بناتها تواجه الدنيا بالشكل ده من غير توجيه ولا رقابة ولا نصيحة
البنت مش بس مسؤولة عن نفسها
دي صورة بيت كامل واسم عيلة كاملة وتربية سنين طويلة
ربنا يحفظ بناتنا جميعا ويرجع لبيوتنا قيمة الحياء والاحترام اللي كانت دايما اجمل حاجة في مجتمعنا
