بقلم/ الإعلاميه:- مروة شعلان
في مشهد مستفز وغريب عن عاداتنا وتقاليدنا شفت فيديو منتشر على السوشيال ميديا لبنت واقفة قدام المقابر وبتضحك وبتخبط على باب المقبرة وبتقول يا جدي افتح يا جدي وكأن المكان ده مش له حرمة ولا احترام
الموضوع بصراحة ما كانش هزار خفيف ولا محتوى عادي زي ما البعض ممكن يفتكر المقابر ليها هيبة وليها حرمة ولها احترام كبير في قلوبنا كلنا لأنها مش مجرد مكان دي بيوت ناس راحت عند ربنا
إحنا اتربينا إن زيارة المقابر تكون للدعاء والاعتبار وتذكر الآخرة مش للتصوير والضحك وصناعة محتوى يجرح مشاعر الناس ويكسر حرمة المكان
اللي حصل ده مش مقبول ولا ينفع نسكت عليه ولا ينفع يتحول لقصة هزار على حساب مشاعر أسر فقدت أحبابها
وعشان كده أنا بشكل شخصي أعلن رفضي التام للسلوك ده وبتقدم ببلاغ رسمي ضد التصرف غير المسؤول ده علشان لازم يبقى في حدود ولازم يبقى في احترام ولازم نربي أولادنا إن المقابر مش مكان للهزار ولا صناعة الترند
احترام الموتى مش اختيار ده واجب واحترام مشاعر الناس مش ضعف ده أصل من أصول التربية والأخلاق
