بقلم/نشأت البسيوني

جوا كل واحد فينا مكان سري محدش يعرفه غيره مكان بيخبي فيه وجعه وفرحته صمته وصراخه خوفه وقوته وكل حاجة مش قادر يحكيها ولا يعرف ينساها المكان ده بيبقى ساكن ساكت بس مليان حياة كأن فيه عالم صغير مش مرسوم على وشك ولا باين في كلامك لكنه عايش جواك بيفكرك كل يوم انك مش مجرد ملامح بتمشي في الشارع ولا مجرد حد بيعدي من الدنيا لا ده انت قصة

متخبية جوا روحك بتحارب علشان ما تقعش وبتحب علشان ما تنطفش وبتحلم علشان ما تتكسرش في المكان السري ده الانسان بيكلم نفسه بصوت مابيطلعش لبرا بيعاتبها ويطبطب عليها ويداري ضعفها ويقويها من غير ما حد يحس وكل مرة الدنيا بتوجعه شوية المكان ده يكبر ويشيل ويستحمل ويسكت والسكوت اللي جواه مش هروب لكن حكمة عمر طويل اتعلم فيه ان الكلام مش دايما

بينقذ وان الصبر ساعات اقوى من المواجهة المكان السري جوا الانسان هو اللي بيخليه يكمل هو اللي بيخليه يصحى كل يوم رغم التعب ويبتسم رغم الجرح ويحب رغم الخذلان ويعافر رغم الخوف لأن فيه نور صغير مستخبي جواه ونور صغير ساعات يكفي يحيي مدينة كاملة من جوه الروح ولو الناس شافت اللي جوا المكان ده كانت هتعرف ان ابسط شخص ماشي في الشارع شايل جوا قلبه

جبال من الحكايات وحروب من الليالي وذكريات عمرها ما كانت سهلة لكن برضه شايل قدرة على النجاة محدش يقدر يفسرها ولا يقلل منها المكان السري ده بيقول للانسان انه رغم كل اللي حصله لسه واقف ولسه فيه حاجة تستحق يعيش علشانها حاجة تخصه هو وبس