حين يتسع الجرح
بقلم/نشأت البسيوني

في لحظه غريبه من حياتك تكتشف إن الجرح مش دايما بيضيق بالعلاج ولا بيخف بالكلام ولا بيتقفل بالوقت ساعات الجرح يتسع يكبر يتمد جوه صدرك لحد ما تحس إن النفس بقى تقيل وإن الحياه بقت أضيق من إنها تشيلك وإنك مش فاهم اتغيرت ليه ولا قلبك بقى صلب في حاجات وضعيف أوي في حاجات تانيه وتلاقي نفسك واقف قدام مرايه مش عارف الشخص اللي قدامك هل ده

انت اللي كنت بتضحك بسرعه وتسامح بسرعه وتحب بسرعه ولا واحد جديد اتشكل من كتر الخدوش وتبدأ تسأل نفسك الأسئله اللي عمرك ما توقعت تواجهها ليه استحملت ليه سكت ليه أديت أكتر من اللي تملك وليه صدقت ناس ما صدقوش فيك وليه تمسكت بقلوب كانت بتبعد كل يوم خطوة وليه فضلت واقف في أماكن كان لازم تمشي منها من زمان وتفتكر إنك كنت بتحاول

ترضي الدنيا كلها إلا نفسك وإنك كنت دايما بتختار الصبر حتى لما الصبر وجعك والسكوت حتى لما السكوت كسرك والهدوء حتى لما الهدوء خنقك ومع كل دا تستوعب إن الجرح لما يتسع مش نهايه بالعكس يمكن يكون بدايه بدايه نضج بدايه فهم بدايه يقظة القلب لأن الوجع ساعات بينضفك من الناس الغلط ومن العلاقات اللي كانت عامله زي الغبار على روحك ومن المعارك اللي ماكنتش

معاركك ومن المحاولات اللي ماكنتش ليك أصلا وتلاقي إنك أول مره تشوف الأمور من فوق لا من جوه تشوف مين فعلا كان جنبك ومين كان شكلا وبس ومين كان بيحبك علشانك ومين علشان مصلحته ومين كان بيلمس وجعك ومين كان بيزود عليه وفي وسط الجرح الكبير ده هتعرف إنك ماوقعتش ضعف لكن تعبت وإنك ما انسحبتش خوف لكن اتأذيت وإنك ما بقتش زي الاول لأن

اللي مرّ بيك كان أكبر من إنك ترجع الشخص السابق وإن ربنا بيهيئك لحياه أنضج لطريق أوسع لقلب يستحق حب صادق وراحة حقيقية وإحساس ما يتباعش بعشر بنادمين وإن كل الخدوش اللي فيك كانت بتكتب على جدار روحك جمله واضحه انت تستحق أحسن من اللي قبله وأقوى من اللي وجعك وأعلى من اللي كسر ظهرك وتبدأ من جديد مش بنفس القلب لأ بقلب اتعلم حدود نفسه

اتعلم مين يستحق ومين لا اتعلم إن الراحة أهم من أي تظاهر وإن الكرامه ما تتجزأش وإن اللي يوجع مره هيوجع عشره وإن اللي يغيب يوم برضه هيغيب في أصعب وقت وإن اللي يبيعك بكلمه مش هيشتريك بعمر وإنك مش مسؤول عن بقاء حد ولا رحيل حد لكن مسؤول عن نفسك بس وعن إنك ما تسمحش لحد يعاملك بأقل من اللي تستحقه وتفوق وتلاقي إن الجرح اتسع فعلا بس اتسع

علشان يطلع اللي ماينفعش جواه ويفضل اللي له قيمه وتفهم إنك مش مجروح انت في مرحله شفاء مرحله ترتيب مرحله انتقال لحياه أنضف ولأيام أهدى ولقلب هيفرح من جديد حتى لو دلوقتي مش شايف إزاي