بقلم/نشأت البسيوني
في لحظة مافيهاش مقدمات ولا علامات ولا إنذار بنصحى في نص الليل وصوت الدنيا ساكت وقلبنا هو الوحيد اللي بيتكلم صوت خافت لكنه صريح قوي لكنه موجع كأنه بيصحينا مش من النوم بس من الغفلة من الركض الطويل من التعب اللي ما اعترفناش بيه ومن الحاجات اللي دفناها جوانا علشان نكمل اليوم اللي بعده ولا كأن في حاجة حصلت الليل دايما بيعري الحقيقة لأن الظلمة مش
بتكتم الصوت بالعكس بتطلع الصوت اللي خبيناه جوه الصمت وتخلينا نشوف اللي ما رضيناش نشوفه وإحنا واقفين في الزحمة وتسمعنا اللي كتمناه علشان ما ننهارش وتواجهنا بعيوبنا بشجاعتنا بضعفنا بكل اللي حاولنا نهرب منه سنين طويلة وفي اللحظات دي نفهم إن الإنسان مش بيتغير بالعمر ولا بالسنين ولا بعدد الأيام اللي عدت الإنسان بيتغير بنقطة واحدة لحظة واحدة كلمة واحدة
موقف واحد يهد كل اللي جواه ويعيد بنائه من جديد يمكن كلمة وجعته ويمكن خذلان كسّره ويمكن رحيل حد كان شايل عليه حياته كلها ولما راح حس إن الأرض تهزت من تحته ومع الوقت نكتشف إن الرجوع لنفسنا مش سهل ده أصعب رحلة لأنها مش لبلد ولا لشارع ولا لبيت الرجوع لنفسك معناه إنك هتفتح أدراج قديمة وتواجه ذكريات كانت بتوجعك وتكمل الطريق وانت شايل روح
اتعبت وقلب اتخدع وعقل اتلخبط وتقول لنفسك ما تخافيش هتعرفي ترجعي حتى لو الطريق اتشقلب حتى لو الدنيا اتهدت فوق راسك ونلاقي إننا اتبدلنا بدون ما نلاحظ بقينا نتحمل اللي زمان ما كناش نقدر عليه بقينا نسكت بدل ما نرد ونهدي بدل ما نثور نفهم بدل ما نحاكم ونبعد بدل ما نتعلق ونمشي من غير ما نعمل ضجة لأن الصمت بقى أغلى من أي كلام والراحة بقت أهم من أي وجود
والسلام بقى أغلى من أي علاقة تاخد من روحنا وتسيبنا فاضيين
ونتفاجئ إن اللي كان بيكسرنا زمان بقى دلوقتي مجرد موقف نعديه وإن اللي كان بيعطلنا بقى درس يعلمنا وإن الناس اللي خسرناهم ما كنوش نصيب وإن البيبان اللي اتقفلت كانت حماية مش خذلان وإن الطريق اللي لف بينا كان بيودينا لحاجة أكبر بكتير من اللي إحنا بنفهمه وقتها ونشوف الحياة بعين مختلفة عين
اتعلمت إن كل شيء بتعويض إلا النفس لو ضاعت وإن كل شيء بيتصلح إلا الأمان لو اتكسر وإن كل شيء بيرجع إلا اللحظة اللي راحت والعمر اللي اتسرق والطيبة اللي اتستغلت والقلوب اللي اتقهرت علشان حد ما يستحقش ومع كل ده نلاقي نفسنا بنكبر بروايقان مش بحدة بننضج في الصمت مش في الكلام بنفهم قيمتنا بدون ما نثبتها ونحب نفسنا بدون ما نستأذن ونحافظ على
روحنا كأنها آخر حاجة نجت بعد معركة طويلة وفي الآخر نوصل للحقيقة اللي الليل بس بيعرف يوصلها لنا الحقيقة اللي تهز الروح من عمقها إن اللي بنبحث عنه مش برا مش في ناس ولا أماكن ولا كلام اللي بندور عليه جوا في قلب اتظلم واتأذى واتعب لكنه لسه بيحب ويتمنى ويصدق وفي روح اتكسرت مرتين وتلمت تلاتة ولسه واقفة وفي عقل اتشتت ورجع لملم نفسه من الأول ونفهم إن
ليلنا مش ظلمة ليلنا مرآة مرآة كبيرة بتورينا إحنا مين وإيه اللي اتغير وإيه اللي باقي وإيه اللي محتاجين نسيبه وإيه اللي لازم نرجعله وفي النهاية نعرف إن الليل مش بيصحينا علشان نخاف لكن بيصحينا علشان نفتش عن نفسنا اللي ضاعت وسط النهار وسط الضوضاء وسط الناس وسط كل اللي حاولنا نكونه واللي حاولنا نرضيه والليلة اللي نواجه فيها نفسنا هي الليلة اللي نبدأ فيها نتولد
من جديد بتفكير جديد بروح جديدة بقوة أكبر بوعي أوسع وبقلب ما بقاش زي الأول ولا ناوي يرجع زي الأول ودي اللحظة اللي يفهم فيها الإنسان إن أعظم رحلة في الدنيا مش اللي بناخدها برجولنا لكنها اللي بناخدها جوا نفسنا الرحلة اللي الليل بس يعرف يفتح بابها ويقول لنا اتفضلوا شوفوا حقيقتكم وهنا بس تبدأ الحياة الحقيقية تبدأ من جوه مش من برا
